ఊసరవెళ్లి చంద్రబాబు


ఆంధ్ర ముఖ్యమంత్రి చంద్రబాబును చూస్తే ఊసరవెళ్లి కూడా సిగ్గుపడుతుందేమో! రాష్ట్ర అవతరణ దినోత్సవం రోజున చంద్రబాబునాయుడు చేసిన ప్రసంగం ఆయన అజీర్తిని, అక్కసును, ఉక్రోశాన్ని మరోసారి బయటపెట్టింది. ఈ ఆరు దశాబ్దాల్లో ఆంధ్ర ఆధిపత్య శక్తుల తెలంగాణ ఎంతగా నష్టపోయిందో, తెలంగాణను కొల్లగొట్టే అవకాశం చేజారిపోయినందుకు ఇప్పుడు ఎంతగా ఆక్రోశిస్తున్నాయో చంద్రబాబు మాటలు వింటే అర్థం అవుతుంది. చంద్రబాబు మారడు. చంద్రబాబు మారినట్టు నటిస్తుంటాడు. బుద్ధి మాత్రం ఎక్కడ ఉండాలో అక్కడే ఉంటుంది. చంద్రబాబునాయుడు 2009 ఎన్నికలకు ముందు టీఆర్‌ఎస్‌తో పొత్తుకోసం తెలంగాణ రాష్ట్ర ఏర్పాటుకు కృషి చేస్తాం అని తమ పార్టీ మేనిఫెస్టోలో పెట్టినప్పుడు కూడా ఆయనను ఎవరూ నమ్మలేదు. చంద్రబాబు మోసగాడు అని తెలుసు. ఆయన మోసం 2009 సాధారణ ఎన్నికల్లోనే బట్టబయలైంది. టీఆర్‌ఎస్‌తో పొత్తు పెట్టుకున్నట్టే పెట్టుకుని, 30 నియోజకవర్గాల్లో తన పార్టీ అభ్యర్థులను పోటీ అభ్యర్థులుగా దింపాడు. ఆ దెబ్బతో తెలంగాణ వాదాన్ని, టీఆర్‌ఎస్‌ను నాశనం చేయవచ్చని కుట్ర పన్నాడు. అయితే ఒక్క మేలు జరిగింది. ఒక ప్రధాన పార్టీగా ఉన్న టీడీపీ అధికారికంగా తీర్మానం చేయడం ఆరోజుకు ఒక ఘనవిజయం. అప్పుడు ముఖ్యమంత్రిగా ఉన్న వై ఎస్ రాజశేర్‌రెడ్డి ఒక్కడే తెలంగాణకు అడ్డమూ నిలువూ అయి కూర్చున్నాడు. నిజానికి 2006లోనే తెలంగాణ ఏర్పడి ఉండాలి. అప్పుడు కూడా రాజశేఖర్‌రెడ్డి కాంగ్రెస్ అధినాయకత్వాన్ని బ్లాక్‌మెయిల్ చేసి రాష్ట్ర ఏర్పాటు ప్రయత్నాలను అడ్డుకున్నాడు. తెలంగాణ ఉద్యమానికి వ్యతిరేకంగా ఎన్నికుట్రలు చేయాలో అన్ని కుట్రలు రాజశేఖర్‌రెడ్డి చేశాడు. 2009 ఎన్నికలలో కూడా మొదటి దశ ఎన్నికలు అయిపోగానే హైదరాబాద్ వెళ్లాలంటే వీసా తీసుకోవాలా అని ఆంధ్రా ప్రజలను రెచ్చగొట్టి ఓట్లు దండుకుని రెండో సారి గెలిచారు. ఎటొచ్చీ చివరిదాకా తెలంగాణకు అడ్డంగా నిలబడింది రాజశేఖర్‌రెడ్డి.

చంద్రబాబునాయుడిది ఎప్పుడూ అవకాశవాద వైఖరే. ఒకప్పుడు తెలంగాణ పదాన్ని ఉచ్చరించడానికి వీలు లేదని చెప్పిన పెద్దమనిషి, 2009 ఎన్నికలు వచ్చేసరికి ఓట్లకోసం తెలంగాణ రాష్ట్ర ఏర్పాటును సమర్థిస్తూ నిర్ణయం చేశారు. ఎన్నికల్లో ఓడిపోయిన తర్వాత మళ్లా ఆ ఊసు లేదు. రాజశేఖర్‌రెడ్డి మరణానంతరం తెలంగాణ ఉద్యమం ఊపందుకుంది. ఇప్పటి ముఖ్యమంత్రి కల్వకుంట్ల చంద్రశేఖర్‌రావు ప్రాణాలకు తెగించి దీక్ష పూనారు. రాష్ట్రమంతా ఉద్యమం తీవ్రతరమైంది. అసెంబ్లీలో తీర్మానం పెట్టండి సమర్థిస్తాం అని చంద్రబాబు చెప్పారు. అసెంబ్లీలో ప్రధాన పార్టీలన్నీ రాష్ట్ర ఏర్పాటుకు అనుకూలంగా తమ అభిప్రాయాలు చెప్పాయి. ముఖ్యమంత్రి రోశయ్య అదే నివేదిక కేంద్రానికి పంపారు. కేంద్రంలో బీజేపీ కూడా తెలంగాణకు అనుకూలంగానే ఉంది. అప్పటికి కేసీఆర్ దీక్ష 11వ రోజుకు చేరింది. పార్లమెంటులో కూడా అన్ని పక్షాలు కేసీఆర్ ఆరోగ్యంపట్ల ఆందోళన వ్యక్తం చేశారు. దీంతో 2009 డిసెంబరు 9న తెలంగాణ ఏర్పాటు ప్రక్రియను ప్రారంభిస్త్నున్నట్టు అప్పటి హోంమంత్రి చిదంబరం ప్రకటించారు. ఆ తర్వాత చంద్రబాబు పేద్ద పిల్లిమొగ్గ వేశారు. ఆంధ్ర ఆధిపత్య శక్తులను రెచ్చగొట్టి ఎన్టీఆర్ ట్రస్టు భవన్ నుంచి ఉత్తుత్త నమూనా రాజీనామా పత్రాలు ఆంధ్రా ఎమ్మెల్యేలందరికీ పంపించి సంతకాలు చేయించి, రాజీనామాల నాటకం ఆడించాడు. చంద్రబాబు, కిరణ్‌కుమార్‌రెడ్డి ముఠా కుట్రల కారణంగా తెలంగాణ మూడేండ్లు వెనుకకుపోయింది. తెలంగాణ బిడ్డలు స్వరాష్ట్రం ఇక రాదేమోనన్న నిరాశానిస్పృహల్లో వందలాది మంది యువకులు ఆత్మారణ చేసుకోవలసి వచ్చింది. సమ్మెలు, బంద్‌లు, ర్యాలీలు, పోలీసుల నిర్బంధాలు…తెలంగాణ అనుభవించిన క్షోభ అంతా ఇంతా కాదు. అయినా తెలంగాణ పట్టినపట్టు పట్టువిడువకుండా నిలిచి గెలిచింది. మూడేండ్లు గడిచాయి. చంద్రబాబు అప్పటి నుంచి ఇప్పటిదాకా అదే పాట పాడుతున్నడు.

విస్మయం కలిగించే అంశం ఏమంటే ఇంకా టీడీపీ దిమ్మలు, జెండాలు, ఏజెంట్లు ఈ రాష్ట్రంలో మిగిలి ఉండడం. చంద్రబాబు ఎజెండాను మోస్తూ తెలంగాణవాదులపై, తెలంగాణ ప్రభుత్వంపై దాడులు చేయడం. వీళ్లకు ఆత్మభిమానం, చీమూ నెత్తురూ ఉన్నాయా? ఇంకా ఆ ఆంధ్ర పార్టీలో ఎలా ఉంటున్నారు? ఎలా మాట్లాడుతున్నారు? ఆంధ్ర ప్రయోజనాలకు వ్యతిరేకంగా మాట్లాడే పార్టీ ఏదన్నా ఉంటే ఆంధ్రాలో బతకనిస్తారా? తెలంగాణ సహనం ఎంత గొప్పది అని పదవీ విరమణ చేసిన ఓ చరిత్ర అధ్యాపకుడు ఆవేశంగా అన్నారు. ఒక కఠినవాస్తవం ఏమంటే తెలంగాణపై చంద్రబాబుకు ఇంకేమాత్రం ఆశలు లేవు. తెలంగాణలో ఆశలు పెట్టుకున్నవారెవరూ రాష్ట్ర విభజనపై ఇంత దుర్మార్గంగా మాట్లాడరు. వచ్చే ఎన్నికల్లో మొన్న వచ్చిన సీట్లు, ఓట్లు కూడా రావని ఆయనకు బాగా తెలుసు. అయినా తెలంగాణవాళ్లు తెలివితక్కువ వాళ్లని ఆయన నమ్మకం. మరికొంతకాలం భ్రమలు సాగు చేయవచ్చునని ఆయన భావిస్తున్నారు. అసలు విషయం మాత్రం ఓటుకు నోటు కేసుకోసం మాత్రమే తెలంగాణ టీడీపీ శాఖను మోస్తున్నారు. కేవలం ఒక ప్రత్యేక అవసరంకోసం మాత్రమే ఇంకా ఇక్కడ జెండా పీకేయకుండా కొనసాగిస్తున్నారు. తెలంగాణలో ఇంకా డబ్బుఖర్చు పెట్టడం అవసరమా అని చంద్రబాబు సన్నిహితులు వరంగల్ ఎన్నికల సమయంలోనే ప్రశ్నించారట. ఇక్కడి నాయకులేమో ఇంకా చంద్రబాబు వలలకు చిక్కుతూనే ఉన్నారు. తెలంగాణ విముక్తి పొందినా వారు మాత్రం ఇంకా ఆయన సేవలో తరిస్తూనే ఉన్నారు. చంద్రబాబుది ఒక్క తెలంగాణ విషయంలోనే కాదు ప్రత్యేక హోదా విషయంలోనూ అవకాశవాదమే. ఆంధ్రకు ప్రత్యేక హోదా ఇవ్వాలని వాదించింది అప్పటి ప్రతిపక్షనాయకుడు వెంకయ్యనాయుడు. ఐదేండ్లు కాదు పదేండ్లు కావాలని వెంకయ్యనాయుడు, చంద్రబాబునాయుడు అందరూ ఒక్కటే పాట పాడారు. ఆంధ్రకు అన్యాయం జరిగిందనే పేరుతో పోలవరం ప్రాజెక్టుకోసమని తెలంగాణ నుంచి ఏడు మండలాలను లాగేసుకోవడంలో కూడా వీరిద్దరిదే ప్రధాన పాత్ర. ఇప్పుడు కేంద్రం ప్రత్యేక హోదా లేదు పొమ్మంటే, అంతకంటే ఎక్కువే ఇస్తున్నాం, ప్రత్యేక హోదా ఎందుకు అని ప్రశ్నిస్తున్నారు. ఇన్ని మాటలు మార్చిన ఈ పెద్ద మనుషులు ఇప్పుడు ఆంధ్ర ప్రజల సంరక్షకులుగా పోజులు పెడితే జనం నమ్మాలి. చంద్రబాబునాయుడు ఆంధ్ర ప్రయోజనాల రక్షకునిగా పాత ఏడుపే ఏడిస్తే జనం కరిగిపోవాలి? జనం ఒక్కసారి మోసపోతారు. పదేపదే మోసం చేయడం సాధ్యం కాదు. ఏమాత్రం నిజాయితీ లేని నాయకులు వీళ్లు.

చంద్రబాబునాయుడుకు నిజాయితీ ఉంటే ఈపాటికి రాజధాని నిర్మాణం పూర్తయ్యేది. ఎన్ని అంతస్తుల భవనమైనా మూడేండ్లకు మించి పట్టదు. ఆయన చేసిన వృధా ఖర్చులతోనే అసెంబ్లీకి, సచివాలయానికి సరిపోను నిర్మాణాలు పూర్తి చేసి ఉండవచ్చు. కానీ చంద్రబాబు లక్ష్యం అదికాదు. రాజధానిని తన సొంత ఎస్టేట్‌గా మార్చుకునే ప్రయత్నంలో ఇంతవరకు అసలు నిర్మాణాలు చేపట్టలేదు. ఇవ్వాళ భవంతులు కట్టడానికి సింగపూరు, హాంకాంగ్, టోక్యో నిపుణులు అవసరం లేదు. నిర్మాణ రంగంలో భారత దేశాన్ని మించిన దేశం ఏమీ లేదు. దుబాయ్‌లోని బుర్జు ఖళీఫా నిర్మాణంలో కూడా మన ఇంజనీర్లదే ప్రధాన పాత్ర. పెద్ద పెద్ద విమానాశ్రయాలన్నీ మనవాళ్లు నిర్మించినవే. ఢిల్లీ, ముంబయి, హైదరాబాద్‌లతోపాటు పలు అంతర్జాతీయ విమానాశ్రయాల నిర్మాణంలో మనవాళ్లదే ప్రధాన పాత్ర. జీఎంఆర్, జీవీకేలు ఎంత ఖ్యాతి గడించాయో తెలుసు. చత్తీస్‌ఘడ్ రాజధాని నిర్మాణ కాంట్రాక్టర్లలో ఎక్కువమంది మనవాళ్లే. కానీ చంద్రబాబునాయుడు సామాన్యమైన నాయకుడు కాదు కదా. తెరవెనుక, తెరముందు ఎన్నో ఉంటాయి. అన్నీ సెటిల్ అయిన తర్వాతగానీ ఆయన ఏదీ చేపట్టరు. రాజధానిలో మరొక పక్షానికి చోటు లేకుండా చేయడం, తన వాళ్లు మాత్రమే చుట్టూ ఉండేట్టు చూసుకోవడం, ఇంకా ఎన్నో పనులు చేయాలి. అందుకే అసలు నిర్మాణాలు పక్కనపెట్టి కొసరు నిర్మాణాలు చేపట్టారు. ప్రజలకు అందుబాటులో ఉండడం కోసం హైదరాబాద్ నుంచి వచ్చేసినట్టు చెబుతున్నారు. హైదరాబాద్‌నుంచి ఆగమేఘాలపై ఎందుకు పోవలసి వచ్చిందో ఓటుకు నోటు కేసులో ఉపయోగించిన ఫోను సంభాషణలు చెబుతాయి. ఆయన నోరు తెరిస్తే నాది తెరిచిన పుస్తకం అని చెబుతారు. నిజమే ఆయనది తెరిచిన పుస్తకమే. పేజీల నిండా రక్తపు మరకలు, నల్ల మరకలే.

Advertisements

About kattashekar

Editor, Namasthe Telangana Daily, Hyderabad
This entry was posted in Political Commentary. Bookmark the permalink.