కజిన్ హజారేలు!


అద్దాల మేడలో కూర్చున్నవారు లోకంపైకి
రాళ్లు విసిరితే ఏమవుతుంది?
సవాలక్ష కుంభకోణాలకు సారథులు
అవినీతి బాగోతాలకు ఆదిగురువులు
నీతిశాస్త్రం బోధించడం మొదలుపెడితే ఎవరు వింటారు?
సకల అవలక్షణాలతో ప్రజల ఛీత్కారానికి గురైనవారు
అన్నా హజారేకు కజిన్‌లమని
గాంధీకి మనవళ్లమని చెప్పుకుంటూపోతే
జనం ఏమనుకుంటారు?
అవతలి వాడు బొందలో పడ్డాడని
పత్రికలూ, పార్టీలూ కలసి నిస్సిగ్గుగా తీన్‌మార్ ఆడితే
విధి చూస్తూ ఊరుకుంటుందా?
కుడి ఎడమల పారిశ్రామికవేత్తలను,
ముందు వెనుకల కాంట్రాక్టర్లను
నెత్తిపైన దళారీలను పెట్టుకున్నవారు
ఎదుటివాడి గుండుపై ఈకలు పీకాలని చూస్తే
అదేపనిగా అబద్ధాలవర్షం కురిపిస్తూ పోతే
ఏదోఒకరోజు పాపం పండకపోతుందా?
ప్రచారంతో, పటాటోపాలతో ప్రజలను
ఏమైనా చేయవచ్చునని, ఏమార్చవచ్చునని నమ్మేవారికి
గుణపాఠం చెప్పేకాలం రాకపోతుందా?

‘బాబు మీద ఎన్నో కేసులు వేశారు. ఎప్పుడో కొట్టేశారు. ఇప్పుడు వేస్తున్న కేసూ అటువంటిదే’ అని తెలుగు తమ్ముళ్లు ప్రజలను నమ్మించే ప్రయత్నం చేస్తున్నారు. కొట్టేసిన కేసుల జాబితానొకదానిని విడుదల చేశారు. అందులో ఒక కీలకమైన సమాచారం ఉంది. ఆ జాబితాలో పేర్కొన్న కేసుల్లో రెండు తప్ప మిగిలినవన్నీ  రాష్ట్రంలో చంద్రబాబు, కేంద్రంలో ఎన్‌డిఏ ఏలుతున్న కాలంలో వేసినవే. కోర్టులు కొట్టివేసిందీ దాదాపు ఆ కాలంలోనే.

ఉష్ట్రపక్షుల ప్రేలాపనలు
పెట్టుబడికి, కట్టుకథకు పుట్టిన
వక్ర చరిత్ర పురుషులారా!
అసత్యానికి, ఆధిపత్యానికి
అవతరించిన మేధావులారా?
విద్వేషం ఆకృతి పోసుకున్న
విశాలాంధ్ర పెద్దమనుషులారా!
ఇక్కడ దశాబ్దాలుగా జరుగుతున్న
నరమేధం మీ కళ్లకు కనిపించడం లేదా?
మీ సమైక్యతలోని డొల్లతనాన్ని
మీ విద్వేషం తెలియజేస్తుంది!
మీ విశాలతలోని సంకుచితాన్ని
మీ అబద్ధాలు పట్టిస్తున్నాయి!
మీ చరిత్రలోని కాల్పనికతను
మీ రాతలు బట్టబయలు చేస్తున్నాయి!
మీ విశాలాంధ్ర ఇంకే మాత్రం
మమ్మల్ని మోసం చేయలేదు!

ఇంకా ఏమి రుజువులు కావాలి?
గత నాలుగు మాసాల్లో ఆత్మహత్యలు చేసుకున్న 180 మంది రైతుల్లో 143 మంది తెలంగాణవారే ఎందుకున్నారు?
1995 నుంచి 2010 వరకు ఆత్మహత్యలు చేసుకున్న 31120 మంది రైతుల్లో 70 శాతం మంది తెలంగాణ వారే ఎందుకయ్యారు?
1985లో అఖిలపక్షం తీర్మానం మేరకు ప్రారంభించిన పోతిరెడ్డిపాడు రెగ్యులేటర్ అనేక బాహువులతో 44000 క్యూసెక్కుల నీటితో మూడు కాలువలు-తెలుగు గంగ, కుడికాలువ, కడప-కర్నూలు కాలువల ద్వారా రిజర్వాయర్లలోకి ప్రవహిస్తుంటే, అదే తీర్మానంలో ఆమోదం పొందిన ఎస్‌ఎల్‌బీసీ ఇంకా ఎందుకు పూర్తి కాలేదు? ఛిద్రమైన అవయవాలతో, మొండి దేహాలతో ఇంకా నల్లగొండ ఎందుకు భారంగా జీవితాన్ని ఈడ్చుతోంది? ఇచ్చంపల్లి ఎందుకు మొదలు పెట్టలేదు? భీమా ప్రాజెక్టు ఎందుకాగిపోయింది? జూరాల నీటి నిల్వ సామర్థ్యం రెండు దశాబ్దాల తర్వాత కూడా ఎందుకు పెరగలేదు? రాజోలిబండ మహబూబ్‌నగర్ గొంతులు ఎందుకు తడపడం లేదు? శ్రీరాంసాగర్‌కు పురిట్లోనే సంధికొట్టిందెవరు?

మీరు మాట్లాడుతున్నది జీడీపీ లెక్కల గురించే కదా!
రంగారెడ్డి జిల్లా జనాభా డివైడెడ్ బై రామోజీ ఫిల్మ్ సిటీ ప్లస్ సంఘీనగర్ ప్లస్ శంశాబాద్ విమానాశ్రయం ప్లస్ జీవీకే ఫామ్ హౌజ్ ప్లస్ లహరి రిసార్టు ప్లస్ ప్రగతి రిసార్ట్సు ప్లస్ నగరం చుట్టూ పరుచుకున్న వేలాది ఎస్టేట్లు ప్లస్ వందలాది పరిశ్రమల విలువ ప్లస్ రంగారెడ్డి జిల్లా ప్రజల ఆస్తుల విలువ ఈజ్ ఈక్వల్టు రంగారెడ్డి జిల్లా పౌరుని తలసరి ఆదాయం. పోయిన ఏడాదికి, ఈ ఏడాదికి  ఒక పౌరుని తలసరి ఆదాయంలో వచ్చే మార్పు అభివృద్ధి రేటు. ఈ లెక్కలు చూస్తే బ్రహ్మాండంగా ఉంటాయి. తలసరి ఆదాయం మూడు రెట్లు నాలుగు రెట్లు పెరుగుతుంది. కానీ బాబూ ఈ ఆస్తులెవరివి? ఈ ఎస్టేట్లు ఎవరివి? ఈ కంపెనీలు ఎవరివి? ఎవరి సంపదను ఎవరి ఖాతాలో చూపుతున్నారు? ఏది అభివృద్ధి అని చెబుతున్నారు? ఎవరిని మోసం చేస్తారు? ఒక్క రంగారెడ్డి జిల్లాయే కాదు మహబూబ్‌నగర్, మెదక్, నల్లగొండ జిల్లాల తలసరి ఆదాయాలను, అభివృద్ధి రేట్లను లెక్కించింది ఇలాగే! మీ స్టాటిస్టిక్స్ మీ మోసాన్ని, ద్రోహాన్ని కప్పి పుచ్చుకోవడం కోసం మీరు సృష్టించుకున్న పెద్ద అబద్ధం! కేంద్రాన్ని మోసం చేయవచ్చు, కానీ తెలంగాణ ప్రజలను ఇంకేమాత్రం మోసం చేయలేరు!

మీ నాయకులేం చేశారని ప్రశ్నిస్తున్నారు కదూ!
ఎవరిని బతకనిచ్చారు? ఐదేళ్లూ పూర్తిగా పరిపాలించిన ఒక్క తెలంగాణ నేతను చూపించండి ఈ యాభైయ్యేళ్లలో!  రాకరాక వచ్చిన తెలంగాణ ముఖ్యమంత్రి పీవీ నరసింహారావును పట్టుమని పదిహేను మాసాలు కూడా పనిచేయనివ్వని జై ఆంధ్ర ఉద్యమ చరిత్ర తమరిది. అవినీతికి, అణచివేతకు, అక్రమాలకు పేరుగాంచిన జలగం వెంగళరావును ఈనాడు పల్లకీలో సకల మర్యాదలతో ఊరేగించిన రామోజీరావు, వచ్చిన ఏడాదిలోనే చెన్నారెడ్డిని చెందాలరెడ్డి అని ముద్రవేసి, పత్రికల్లో పతాక శీర్షికల్లో ఆగంపట్టించి పంపడం గుర్తులేదా? మీరు రాసింది చరిత్ర, మీరు చూసింది చరిత్ర, మీరు చెప్పింది చరిత్ర! మా అంజయ్యను ఏకంగా జోకరుగా చిత్రించిన దుర్మార్గ రాజకీయం తమరిది. 1989లో మళ్లీ వచ్చిన చెన్నారెడ్డిని గద్దెదింపడానికి ఏడాది తిరగకుండానే  హైదరాబాద్‌లో మతకల్లోలాలు సృష్టించి రోడ్డపై రక్తపుటేరులు పారించిన దాష్టీకం తమరిది! రాజకీయ వెన్నుపోట్లను, విద్రోహాలను ఒకసారి ప్రజాస్వామ్యంగా, మరోసారి అప్రజాస్వామ్యంగా నమ్మించగల జాణతనం మీ మీడియాది. అవినీతిని, అక్రమాలను, ప్రభుత్వ ఆస్తుల అమ్మకాలను తమకిష్టమైతే అందమైన తివాచీల కింద దాచిపెట్టగలరు. ఇష్టంకానివాడు అధికారంలోకి వస్తే వచ్చిన వారానికే తాటాకులు కట్టగలరు.

ఎవరిది ప్రజాస్వామ్యం?
‘తెలంగాణపై ప్రజారాజ్యం పార్టీకి ఉన్నంత స్పష్టత మరెవరికీ లేదు. కుటుంబంలో సోదరుల మాదిరిగా రాష్ట్రాన్ని విభజించాలని మేము కోరుతున్నాం. మేము తెలంగాణ ప్రజల ఆత్మగౌరవం, ఆత్మాభిమానాలను గౌరవిస్తున్నాం. విభజన అనివార్యమైతే మేము ఎప్పుడు అడ్డుపడబోము’- 2008 అక్టోబరు 16న నిజామాబాద్‌లో ప్రజారాజ్యం పార్టీ అధికార ప్రతినిధిగా పరకాల ప్రభాకర్ మాట్లాడిన మాటలివి. ప్రజారాజ్యం పార్టీ మ్యానిఫెస్టో కమిటీలో అప్పట్లో ఈయనే రింగు మాస్టర్. సామాజిక తెలంగాణ ఏర్పాటుకు ప్రజారాజ్యం పార్టీ కట్టుబడి ఉంటుందని మ్యానిఫెస్టోలో పొందుపర్చడంలో కూడా ఈయన ప్రధాన పాత్ర పోషించారు. తీరా ఎన్నికల సమయంలో టిక్కెట్ రాకపోయేసరికి ప్రత్యర్థి పార్టీలకు అమ్ముడుపోయి, తిన్నింటి వాసాలు లెక్కపెట్టి, అదే పార్టీ ఆఫీసులో చిరంజీవిని నానాబూతులు తిట్టి, పలాయనం చిత్తగించిన నీతిబాహ్యుడు పరకాల!  ఇంత ఘనచరిత్ర కలిగిన పెద్ద మనిషి ఇప్పుడు విశాలాంధ్ర గురించి చెప్పుకోవడానికి ప్రజాస్వామ్యం కావాలని, హక్కులు కావాలని అడుగుతున్నాడు. మాటమార్చినవాడు, మడమతిప్పినవాడు, నీతితప్పినవాడు, అప్రజాస్వామికంగా వ్యవహరించినవాడు ప్రజాస్వామిక హక్కులకు అర్హుడేనా? అన్ని పార్టీలు అంగీకరించి నమ్మకద్రోహం చేసిన తర్వాత కూడా తెలంగాణ ప్రజలు సహనం కోల్పోకుండా వ్యవహరిస్తున్నారు. అయినా విశాలాంధ్ర పేరిట ఆంధ్రా ఆధిపత్య జీలట్స్ తెలంగాణ ప్రజలను రెచ్చగొట్టాలని చూస్తున్నారు. వారి కుట్రలు ఎప్పటికీ ఫలించవు!

పాలసీ పెరాలిసిస్
‘ప్రభుత్వాలు విధానపరమైన పక్షవాతం(పాలసీ పెరాలిసిస్)తో సతమతమవుతున్నాయి’ అని ముఖేశ్ అంబానీ అన్న సందర్భం వేరు, కానీ కేంద్రం విషయంలో అది ముమ్మాటికీ నిజం. రాజనీతిజ్ఞుల కంటే రాజకీయ మరుగుజ్జులు ఇప్పుడు కేంద్రాన్ని పాలిస్తున్నారు. శాసిస్తున్నారు. డైనమిజం, ధీరోదాత్తత, స్థిరచిత్తం, ధైర్యం ఇవేవీ యూపీఏ నాయకత్వంలో కనిపించవు. ఆ మధ్య ఒక అంతర్జాతీయ సర్వేలో అత్యంత వయస్సు పైబడినవారు పరిపాలిస్తున్న దేశాల్లో మనం అగ్రస్థానంలో ఉన్నట్టు వెల్లడయింది. మెమొరీ లాస్, ఊగిసలాట, దృష్టిలోపం ఈ ప్రభుత్వాన్ని పీడిస్తున్నాయి.

‘అధికార వికేంద్రీకరణ, పరిపాలనా సౌలభ్యం కోసం, సమర్థమైన, జవాబుదారీ పాలన అందించడంకోసం చిన్న రాష్ట్రాలు ఉత్తమ మార్గమ’ని చాలా కాలంగా రాజనీతిశాస్త్ర పండితులు, రాజ్యాంగ నిపుణులు సూచిస్తున్నారు. ‘నిర్వహణ దుర్లభంగా మారిన పెద్ద రాష్ట్రాలకు పరిష్కారం దేశాన్ని 40 రాష్ట్రాలుగా విభజించడమే’ అని రాజనీతి శాస్త్రవేత్త రజనీ కొఠారి 1976లోనే ప్రతిపాదించారు. ‘ కేంద్రీకృతమై అచేతనంగా మారిన కాలం చెల్లిన సమాఖ్య వ్యవస్థ స్థానంలో సమతుల, సహకార, సమకాలీన సమాఖ్య వ్యవస్థను ఆవిష్కరించాల’ని, అందుకోసం ‘దేశాన్ని 58 రాష్ట్రాలుగా విభజించాల’ని ప్రొఫెసర్ రషీదుద్దీన్ ఖాన్ 1992లో ‘ఫెడరల్ ఇండియా: ఎ డిజైన్ ఫర్ చేంజ్’ అనే గ్రంథంలో సూచించారు. లోక్‌సభ మాజీ సెక్రెటరీ జనరల్ సుభాష్ సి కాశ్యప్ 1992లో పది లోక్‌సభలపై ఒక గ్రంథాన్ని రాస్తూ, ‘దేశాన్ని 50 నుంచి 60 సమాన స్థాయి రాష్ట్రాలుగా విభజించాల’ని సూచించారు. కానీ రాజకీయ ప్రయోజన దృష్టి తప్ప రాజనీతిజ్ఞత లేని నాయకులు, అవకాశవాదంతో ఏపూటకామాట మాట్లాడడం తప్ప ఒక విధానపరమైన నిబద్ధత లేని నాయకులు కేంద్రంలోనూ, రాష్ట్రంలోనూ కొలువై ఉన్నారు. అవకాశం వచ్చినప్పుడు వీరిని తిరస్కరించడం తప్ప తెలంగాణకు విముక్తి లేదు.

Author: kattashekar

Editor, Namasthe Telangana Daily, Hyderabad

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s